Ministri

Azir Aliu ka lindur më 15 prill 1976, në Gostivar. Ai është inxhinier i diplomuar i elektroteknikës. Ka diplomuar në Fakultetin e Elektroteknikës pranë Universitetit „Shën Kirili dhe Metodi“ në Shkup, ku gjithashtu ka përfunduar studimet e magjistraturës në elektroteknikë. Interesin për shkencën e ka vazhduar në Fakultetin Matematiko-Natyror pranë të njëjtit universitet, ku ka fituar titullin doktor i shkencave informatike.

Në vitet e hershme të karrierës akademike, hapat e parë i ka filluar si asistent i ri në Universitetin e Evropës Juglindore, pasi më parë, gjatë vitit shkollor 2003/2004, ka punuar si profesor në gjimnazin „Pançe Popovski“ në Gostivar. Pjesën më të madhe të karrierës së tij akademike e kalon në Universitetin e Evropës Juglindore në Tetovë. Në periudhën nga shtatori i vitit 2004 deri në prill të vitit 2007, ka qenë i angazhuar si asistent i ri në këtë universitet, ku nga prilli i vitit 2007 deri në vitin 2012 ka punuar si asistent.

Karrierën akademike e vazhdon në të njëjtin universitet, nga viti 2012 deri në vitin 2014, si prodekan për shkencë në Fakultetin e Shkencave Kompjuterike dhe Teknologjisë. Në shtator të vitit 2012 avancoi në titullin docent, funksion të cilin e ka ushtruar deri në vitin 2017. Në pesë vitet në vijim ka qenë profesor i jashtëm, e më pas edhe profesor i rregullt në Universitetin e Evropës Juglindore në Tetovë, nga gushti i vitit 2022 e deri më sot. Më parë, gjatë periudhës nga viti 2018 deri në vitin 2020, ka qenë i emëruar si nënkryetar i Bordit Drejtues të këtij universiteti.

Përvoja e tij profesionale është pasuruar edhe me anëtarësimin në Komitetin Kombëtar për Ndërmarrësi dhe Inovacione, ku ka qenë anëtar nga viti 2013 deri në vitin 2017, periudhë në të cilën ka qenë edhe këshilltar për arsim të lartë i Kryeministrit të Republikës së Maqedonisë së Veriut.

Është autor dhe bashkautor i shumë punimeve shkencore, ndërsa puna e tij kërkimore-shkencore fokusohet në sistemet inteligjente, analizën e sinjaleve dhe imazheve me shumë rezolucione, përpunimin e imazheve mjekësore dhe njohjen e formave, mësimin makinerik dhe programimin paralel.

Përvoja e tij mësimore fokusohet në: Inteligjencën Artificiale; Arkitekturën e sistemeve kompjuterike; Gjuhët formale dhe automatat; Analizën e të dhënave. Aliu ka gjithashtu përvojë të gjerë në menaxhimin e projekteve dhe në punë kërkimore-shkencore në vend dhe jashtë vendit.