Në bashkëngjitje po jua dërgojmë komunikatën për media të Shoqatës së Gjinekologëve Amë, me të cilën shprehet mbështetje për Projektligjin për mbrojtje nga duhani:
Shoqata e Gjinekologëve Amë shpreh mbështetjen e saj të fuqishme dhe të qartë për Projektligjin për mbrojtje nga duhani, i cili parasheh ndalim të plotë të përdorimit të cigareve dhe të gjitha llojeve të produkteve të nikotinës në hapësira të mbyllura, përfshirë cigaret elektronike dhe pajisjet për ngrohjen e duhanit. Si profesionistë shëndetësorë që çdo ditë punojmë me gra në moshë riprodhuese, gra shtatzëna, lehona dhe çifte që përballen me probleme të fertilitetit, konsiderojmë se kjo rregullativë ligjore është e domosdoshme, e arsyeshme dhe në përputhje me dëshmitë bashkëkohore mjekësore.
Të dhënat shkencore tregojnë qartë se nuk ekziston nivel i sigurt i ekspozimit ndaj tymit të duhanit apo aerosoleve të produkteve të nikotinës. Pirja pasive përbën një rrezik serioz për shëndetin dhe lidhet me sëmundje kardiovaskulare dhe respiratore, si dhe me rritje të rrezikut për sëmundje malinje. Sipas Organizatës Botërore të Shëndetësisë, mbi 1.3 milionë njerëz në mbarë botën humbin jetën çdo vit si pasojë e ekspozimit pasiv ndaj tymit të duhanit, ku kategoritë më të rrezikuara janë gratë dhe fëmijët.
Nga aspekti i shëndetit riprodhues, ekspozimi ndaj nikotinës dhe toksinave të duhanit ka ndikim të dëshmuar negativ në fertilitet si te gratë ashtu edhe te burrat. Te gratë, pirja e duhanit dhe pirja pasive lidhen me çrregullime të ovulacionit, ulje të rezervës ovariane, disbalancë hormonale dhe rritje të rrezikut për infertilitet. Te burrat, studime të shumta klinike dhe epidemiologjike konfirmojnë ulje të numrit të spermatozoideve, lëvizshmëri të reduktuar dhe morfologji të dëmtuar të spermës, si dhe rritje të dëmtimit të ADN-së së spermatozoideve, gjë që ul drejtpërdrejt mundësinë për fekondim dhe rrit rrezikun për komplikime riprodhuese.
Gjatë shtatzënisë, ekspozimi ndaj tymit të duhanit dhe nikotinës lidhet me rrezik të shtuar për lindje të parakohshme, peshë të ulët në lindje, retardim intrauterin të rritjes dhe rritje të morbiditetit dhe mortalitetit perinatal. Nikotina dhe substancat e tjera të dëmshme e bartin lehtësisht placentet dhe kanë ndikim të drejtpërdrejtë negativ në zhvillimin e fetusit. Për më tepër, ekspozimi i të porsalindurve dhe fëmijëve të vegjël ndaj tymit dhe aerosoleve të produkteve të nikotinës lidhet me shfaqje më të shpeshtë të astmës, infeksioneve respiratore, otiteve dhe rrezik të shtuar për sindromën e vdekjes së papritur të foshnjave.
Veçanërisht shqetësues është fakti se disa produkte të nikotinës, si cigaret elektronike dhe pajisjet për ngrohjen e duhanit, shpesh paraqiten si alternativa më të sigurta. Hulumtimet bashkëkohore shkencore tregojnë se edhe këto produkte çlirojnë nikotinë, grimca ultrafine dhe përbërje kimike me potencial të dëmshëm për sistemin respirator, kardiovaskular dhe riprodhues, ndërsa përdorimi i tyre pasiv në hapësira të mbyllura paraqet rrezik real për shëndetin.
Për këto arsye, konsiderojmë se ndalimi i plotë dhe jodiskriminues i përdorimit të të gjitha formave të pirjes së duhanit dhe produkteve të nikotinës në hapësira të mbyllura është masë kyçe për mbrojtjen e shëndetit publik dhe riprodhues. Shëndeti i grave, burrave, fëmijëve dhe brezave të ardhshëm duhet të ketë përparësi absolute.
I inkurajojmë institucionet kompetente që ta miratojnë dhe ta zbatojnë me përpikëri Projektligjin pa përjashtime, ndërsa opinionin publik ta njohë këtë masë si investim në shëndetin, fertilitetin dhe të ardhmen e shoqërisë sonë.