Ministri i Shëndetësisë, Azir Aliu, sot në Ministrinë e Shëndetësisë realizoi një takim zyrtar me një delegacion nga Ministria e Shëndetësisë e Malit të Zi, të udhëhequr nga ministri i Shëndetësisë, Vojisllav Shimun. Në takim u konfirmua përkushtimi i përbashkët për avancimin e mëtejshëm të bashkëpunimit dypalësh, me theks të veçantë në proceset integruese evropiane.
“Vendi ynë ka vendosur një bashkëpunim tradicionalisht të mirë dhe miqësor me Malin e Zi, kështu që në takimin me ministrin e Shëndetësisë të Malit të Zi shprehëm gatishmërinë për avancimin e mëtejshëm të bashkëpunimit dypalësh në segmentin e sistemeve shëndetësore. Kemi pasur një shkëmbim përmbajtësor dhe konstruktiv të përvojave lidhur me procesin e harmonizimit të legjislacionit kombëtar me të drejtën e Bashkimit Evropian, si dhe me dinamikën dhe metodologjinë e negociatave të anëtarësimit. Vëmendje e veçantë iu kushtua Kapitullit 28, që i referohet shëndetit publik, si një nga segmentet kyçe në procesin e harmonizimit me standardet evropiane”, theksoi ministri Aliu.
Në takimin dypalësh u theksua pjesëmarrja e përbashkët në Rrjetin Shëndetësor të Evropës Juglindore, ku veçanërisht e rëndësishme është roli i qendrës rajonale për sëmundje jo-ngjitëse në Podgoricë, si dhe qendrës rajonale për sistemet e shëndetit publik në Shkup.
“Së bashku me ministrin e Shëndetësisë të Malit të Zi shqyrtuam mundësitë për shkëmbim të mëtejshëm të ekspertëve dhe stafit mjekësor, bashkëpunim në fushën e përballimit të sëmundjeve jo-ngjitëse, si dhe në drejtim të forcimit të shëndetit publik, digjitalizimit dhe shkëmbimit të praktikave të mira në shëndetësi përmes mundësive për aplikime të përbashkëta në kuadër të programeve rajonale dhe të BE-së”, shtoi Aliu.
Në takim u theksua veçanërisht rëndësia e bashkëpunimit të vazhdueshëm institucional, me qëllim sigurimin e reformave të qëndrueshme dhe efikase në sektorin shëndetësor, në drejtim të përmirësimit të cilësisë së kujdesit shëndetësor dhe forcimit të shëndetit publik, në përputhje me parimet dhe vlerat e Bashkimit Evropian.
Ministri i Shëndetësisë i Malit të Zi, Vojisllav Shimun, ndau përvojën malazeze në procesin e anëtarësimit në Bashkimin Evropian, me fokus të veçantë në Kapitullin 28, i cili i referohet shëndetit publik dhe që, siç theksoi ai, është intensifikuar ndjeshëm dhe ndodhet në fazën përfundimtare të mbylljes.
Ai gjithashtu informoi për pjesëmarrjen e Malit të Zi në programin EU4Health, duke prezantuar projektet për të cilat vendi ka marrë mbështetje dhe duke shprehur gatishmërinë për t’i ndarë këto përvoja, veçanërisht në fushën e digjitalizimit të sistemit shëndetësor dhe përdorimit të mekanizmave evropianë për mbështetjen e reformave në shëndetësi.
