MSH dhe ISHP sigurojnë 2000 maska mbrojtëse N95 - automjetet e ndihmës së shpejtë në dispozicion për banorët e Trubarevës

Ministria e Shëndetësisë, në koordinim me Institutin e Shëndetit Publik, ka siguruar 2.000 maska mbrojtëse N95, të cilat sonte do të shpërndahen për banorët e fshatit Trubarevë të Shkupit. Maskat janë vënë në dispozicion nga Klinika Universitare për Sëmundje Infektive dhe Gjendje Febrile, ndërsa shpërndarja do të realizohet me mbështetjen e ekipeve nga ndërmarrjet publike dhe Komuna e Gazi Babës. Me këtë masë sigurohet mbështetje në kohë për popullsinë lokale, me qëllim uljen e ekspozimit të drejtpërdrejtë ndaj ajrit të ndotur të shkaktuar nga zjarri. Në terren janë të pranishme edhe dy automjete të ndihmës së shpejtë, të gatshme të ndërhyjnë dhe të ofrojnë ndihmën e duhur shëndetësore si për zjarrfikësit, ashtu edhe për qytetarët nëse paraqitet nevoja. “Prioriteti ynë është mbrojtja e shëndetit të qytetarëve, veçanërisht në situata të tilla krizash. Ministria dhe Instituti i Shëndetit Publik do të vazhdojnë me aktivitete të koordinuara për të siguruar ndihmë dhe mbështetje të përshtatshme për të gjithë të prekurit,” tha ministri i Shëndetësisë, Azir Aliu. Ministria e Shëndetësisë dhe Instituti i Shëndetit Publik do të vazhdojnë të ndjekin gjendjen e mëtejshme, me qëllim intervenimin në kohë të të gjitha masave të nevojshme për mbrojtjen e qytetarëve.