Mинистер

Азир Алиу е роден 15 април 1976 година, во Гостивар. Тој е дипломиран инженер по електротехника. Дипломирал на Електротехничкиот факултет при Универзитетот „Св. Кирил и Методиј“ во Скопје, каде и магистрирал електротехника. Интересот за науката го продолжува на Природно-математичкиот факултет при Универзитетот „Св. Кирил и Методиј“ во Скопје, каде се стекнува со звањето доктор по информатички науки. Во раните години од академската кариера, првите чекори ги почнува како помлад асистент на Универзитетот на Југоисточна Европа, откако претходно, во периодот 2003/2004 година, работел како професор во гимназијата „Панче Поповски“ во Гостивар. Најголемиот дел од својата академска кариера го поминува на Универзитетот на Југоисточна Европа во Тетово. Во периодот од септември 2004 година до април 2007 година бил ангажиран како помлад асистент на Универзитетот на Југоисточна Европа во Тетово, каде од април 2007 година до 2012 година работи како асистент. Со академската кариера продолжува на истиот универзитет, од 2012 година до 2014 година, како продекан за наука на Факултетот за компјутерски науки и технологии. Во септември 2012 година напредува во звање доцент, кој работен ангажман го извршува до 2017 година. Во наредните пет години бил вонреден професор, а потоа и редовен професор на Универзитетот на Југоисточна Европа во Тетово, од август 2022 година до денес. Претходно, во периодот од 2018 година до 2020 година, бил назначен за потпретседател на Управниот одбор на овој Универзитет. Неговото професионално искуство е збогатено и со членството во Националниот комитет за претприемништво и иновации, каде членувал од 2013 година до 2017 година, период во кој бил и советник за високо образование на претседателот на Владата на Република Северна Македонија. Автор е и ко-автор на повеќе научни трудови, а неговата научно-истражувачка работа се фокусира на интелигентни системи, анализа на сигнали и мулти-резолуциони слики, обработка на медицински слики и препознавање на облици, машинско учење и паралелно програмирање. Работното искуство во наставата му е фокусирано на: Вештачка интелигенција; архитектура на компјутерските системи; формални јазици и автомати; анализа на податоци; Алиу има и големо искуство со проектно менаџирање и научно-истражувачка работа во државава и во странство.