На покана на директорот на Универзитетската клиника за урологија, научен соработник д-р Башким Шабани, и шефот на Катедрата по хирургија, проф. д-р Оливер Станков, во стручна посета на Клиниката престојуваше проф. д-р Емре Хури од Универзитетот „Хаџетепе“ во Анкара, Република Турција, еден од водечките светски експерти во областа на функционалната и реконструктивната урологија и визитинг професор на Медицинскиот факултет во Скопје.
Во рамки на посетата, проф. д-р Хури, заедно со научен советник д-р Огнен Ивановски, успешно изведоа четири сложени оперативни интервенции кај пациенти со уринарна инконтиненција и тоа три трансобтураторни слинг процедури кај жени и една комплексна реконструктивна интервенција кај машки пациент.
Со воведувањето на овие современи хируршки техники, Универзитетската клиника за урологија ја возобновува женската реконструктивна урологија како стандардна здравствена услуга, целосно покриена од Фондот за здравствено осигурување.
Оваа соработка претставува значаен чекор во унапредувањето на здравствените услуги и воведувањето на највисоките светски стандарди во третманот на уринарната инконтиненција, овозможувајќи им на пациентите во нашата држава пристап до современа и квалитетна здравствена грижа.