Министерството за здравство, во соработка со Мисијата на ОБСЕ во Скопје почна пилот акција за издавање извод од матична книга на родени во болница, согласно член 4-а од Законот за матична евиденција за лицата без државјанство.
На две жени, кои немаат матичен број и секојдневно се соочуваат со низа системски пречки, им се овозможи пристап до системот на здравствена заштита преку Програмата за мајки и деца. Со ова тие добиваат право на бесплатно породување и користење на сите здравствени услуги предвидени за оваа ранлива категорија.
Со пилот акцијата нивните новороденчиња ќе бидат навремено внесени во системот, ќе добијат извод на раѓање, а со тоа и можност да го остварат своето право на државјанство. Ова е конкретен чекор кон справување со генерацискиот ризик од апатридија.
Во рамки на 16 дена активизам против родово базирано насилство, Министерството за здравство ја истакнува важноста од заштита, поддршка и унапредување на правата на жените Ромки, кои често се соочуваат со повеќекратна дискриминација и бариери во пристапот до основни услуги.
Продолжуваме заедно да градиме систем кој никого не остава зад себе.