СИЛНА ИНВЕСТИЦИЈА ВО МЛАДИТЕ ЛЕКАРИ: ВЛАДАТА ОДОБРИ ВРАБОТУВАЊЕ НА 300 ПРИВАТНИ СПЕЦИЈАЛИЗАНТИ
На предлог на министерот за здравство, д-р Сашо Клековски, Владата донесе одлука со која се отвора можност за вработување на уште 300 приватни специјализанти во јавните здравствени установи до крајот на 2026 година.
Оваа одлука претставува силна инвестиција во младите лекари и конкретен чекор кон зајакнување на македонското јавно здравство. Со неа се создаваат услови младите специјализанти своето знаење, стручност и професионална иднина да ги градат во домашниот здравствен систем.
Со вработувањето на 300 приватни специјализанти ќе се овозможи:
- задржување на младите лекари во државата;
- пополнување на недостигот од специјалистички кадар;
- зајакнување на клиниките, болниците, здравствените домови и центрите за јавно здравје;
- порамномерна распределба на медицинскиот кадар низ државата;
- пократко време на чекање и поквалитетна здравствена грижа за пациентите.
„Ова не е само одлука за 300 нови вработувања. Ова е инвестиција во 300 професионални иднини, во посилни здравствени установи и во подобра грижа за пациентите. Не ги школуваме нашите лекари за да ги изгубиме – инвестираме во нивното знаење за да го изградиме здравствениот систем што граѓаните го заслужуваат“, истакна министерот Клековски.
Вработувањата ќе се реализираат согласно потребите на јавните здравствени установи и недостигот од специјалистички кадар, со цел младите лекари да бидат ангажирани таму каде што се најпотребни.
Со оваа одлука, Владата и Министерството за здравство испраќаат јасна порака: младите лекари се темелот на идното јавно здравство, а нивното знаење, труд и професионален развој мора да бидат препознаени и поддржани.
Создаваме трајна вредност – лекари што остануваат, установи што се зајакнуваат и пациенти што добиваат навремена и квалитетна здравствена грижа.
300 специјализанти. 300 нови можности. Еден посилен здравствен систем.