Претставници на Министерството за здравство учествуваа на дводневна висока регионална средба што се одржа во Мадрид, Кралството Шпанија, во организација на Светската здравствена организација – Регионална канцеларија за Европа, посветена на градење здравствени системи насочени кон преживеаните од насилство врз жени и девојчиња.
Настанот ги обедини претставници на министерствата за здравство, меѓународни организации и експерти од Европскиот регион, со цел зајакнување на улогата на здравствениот сектор во превенцијата, раното препознавање и соодветниот одговор на родово базираното насилство.
Во рамки на средбата беше презентиран извештајот на СЗО „Care, Courage, Change: Health sector leadership in ending violence against women and girls“, кој укажува на потребата од целосна интеграција на насилството врз жените во националните здравствени политики, обезбедување пристап до пакетот на основни здравствени услуги и заштита на автономијата, доверливоста и достоинството на жртвите.
Учеството на Министерството за здравство овозможи размена на искуства и следење на европските препораки, кои ќе придонесат за понатамошно унапредување на националниот здравствен одговор кон насилството врз жени и девојчиња, во согласност со стандардите и насоките на Светската здравствена организација.