Министерот за здравство, Сашо Клековски, денеска, имаше средба со д-р Аким Али, претставник на СЗО во земјава, на која стана збор за заедничките приоритети и заложбите за континуирано зајакнување на здравствениот систем во земјата.
Средбата беше фокусирана за натамошно унапредување на постојната програма за работа и усогласување на приоритетите во рамки на националната стратегија за здравство до 2030 година, Стратегијата за соработка со СЗО 2026–2030 и Програмата на Владата во областа на здравството.
На средбата, меѓу другото се разговараше за унапредување на клучната здравствена легислатива и реформите, вклучително и во областа на лековите и пристапот до терапија; зајакнувањето на примарната здравствена заштита и нејзината поврзаност со болничките услуги, зајакнување на превенцијата и промоцијата на здравјето, вклучително и контролата на тутунот и поддршката за откажување од пушење, како и натамошно јакнење на капацитетите на Министерството, и соработката со клучните здравствени институции и партнери.
