Поголеми плати за сите здравствени работници. Од 1 април со линеарното зголемување, по 2500 денари повисоки приходи за сите вработени во јавниот здравствен сектор. Согласно ноемвриското покачување и ова во април, вкупниот раст на платите сега достигна 4815 денари.
Уште повисоки се примањата на медицинските сестри. Со новото покачување тие сега ќе добијат зголемување на платата за 6200 денари, информираше министерот Таравари на прес-конференција, истакнувајќи дека ова е најголем реален пораст на платите во последната деценија.
-Со ова испраќаме порака дека за достоинството на здравствените работници не се преговара. Тоа се брани и се унапредува и ова е само почеток. Министерството за здравство продолжува со работење на системски реформи насочени кон унапредување на работните односи дополнително образование и развој, со цел да се обезбеди стабилност и квалитетен здравствен систем, како и да се обезбеди довербата на граѓаните, посочи Таравари.
Зголемувањето на платите во јавното здравство е во рамки на спогодбата, со која однапред е планиран повеќегодишен раст на платите во јавното здравство.
