Претседателот на Владата на Република Северна Македонија, Зоран Заев, заедно со министрите за здравство, за образование и наука, за правда и за труд и социјална политика, односно Венко Филипче, Арбер Адеми, Рената Дескоска и Мила Царовска денеска се сретнаa со група родители коишто не сакаат нивните деца да ја примат вакцината за заштита од вирусите на морбили, рубеола и паротит или МРП вакцина.
На средбата, премиерот Заев истакна дека одлуката на Владата да прогласи епидемија на ситни сипаници на територијата на целата земја и да се спроведе вонредна вакцинација е донесена врз снова на научни факти и мислења на експерти, според кои во услови на намален колективен имунитет и пораст на бројот на заболени, единствен начин да се сузбие епидемијата е да се спроведе вакцинација во и надвор од здравствените установи.
Родителите од своја страна, пак, изразија став на несогласување за обврската нивните деца да ја примат вакцината и дека очекуваат тие да посетуваат градинка и да бидат запишани во училиште.
Министерот за здравство Венко Филипче рече дека освен со законски норми, во услови на епидемија, вакцинацијата е задолжителна за сите невакцинирани лица, без разлика дали станува збор за деца или за возрасни луѓе. И додаде дека фактот што во градинка не одат невакцинирани деца дава резултати во справување со епидемијата на морбили.
Според родителите вакцинацијата треба да биде право на избор на претходно информиран родител.
Во оваа насока, Владата се заложи во претстојниот период да се спроведе јавна презентација на факти и медицински анализи пред сите засегнати страни, но пред сé пред родителите со цел темелно и точно да бидат информирани за МРП вакцината.
„Владата постои за граѓаните, но моја законска обврска е да ги слушам експертите, стручните анализи. Го задолжувам министерот за здравство, да ве собере на голема презентација и дискусија на којашто пред сите ќе се презентираат медицинските факти и секој ќе може да каже мислење. Наша цел е здравје за децата и граѓаните“, заклучи премиерот Заев на денешната средба со група родители.
