На територијата на целата држава вакцинацијата се одвива со добро темпо, заклучно со 26 септември, со една доза на вакцина против Ковид-19 се вакцинирани 46,9% од населението над 18 годишна возраст. Кај лицата над 40 годишна возраст опфатот со една доза изнесува 55%, кај лицата меѓу 18-39 години опфатот со една доза вакцина изнесува 31%.
Според последните податоци, најмногу со прва доза вакцинирани граѓани има во градовите Охрид (63,9%), Кавадарци (64,3%), Гевгелија(61,4%) и Неготино(65,1%). Меѓу 50-60% опфат на вакцинирано население со прва доза има во градовите: Битола, Демир Хисар, Ресен, Велес, Берово, Пехчево, Прилеп, Крушево, Валандово, Штип и Пробиштип. Меѓу 40-50% опфат на вакицнинирани граѓани има во градовите: Кичево, Св.Николе, Кочани, Делчево, К.Паланка, Струга, М.Брод, Скопје и Тетово. Меѓу 30-40%, односно најмалку вакцинирани во моментов има во: Виница, Куманово, Кратово, Дебар, Струмица, Гостивар и Радовиш.
Во тек е вакцинација во постојните вакцинални пунктови во државата, каде граѓаните може да се вакцинираат без да закажат термин. Вакцини има доволно и тие се достапни за сите што сакаат да се вакцинираат. Со извршена комплетна вакцинација се заштитувате себеси и своите најблиски од компликации на болеста предизвикана од вирусот Ковид-19. Вакцините штитат од смртен исход и спречуваат натамошно ширење на вирусот. Ги повикуваме сите кои досега не се вакцинирале, да го направат тоа во најскоро време и на еден од најблиските пунктови до местото на живеење.
